Pidato Batagak Gala Pangulu

PIDATO BATAGAK GALA PENGHULU

(BATAGAK GADANG)

Assalamu’alaikum Warahmatullah Wabarakatuh

Minta ampunlah hambo pado Allah, maaf diminta ka nan banyak, niniak mamak panghulu, nan gadang basa batuah, nan bapucuak subana bulek, nan baurek subana tungga, alim ulama jo tuanku, cadiak pandai pagaran kokoh, dubalang jo ampang limo, jo manti pagawai adat, nan mudo arih budiman, bundo kanduang samo di dalam.

Manyurek di ateh pintu, mangarang di tapak tangan, malompek nak basitumpu, mancancang nak balandasan, di Datuak ….. tibonyo sambah. Sakali ambo maimbau, sapatah rundiang nan lalu, walau datuak surang nan di imbau, batin dek adat kasamonyo, pangana batin ka nan rapek, ujuik sambah ka nan banyak, saujuik sambah jo simpuah.

Sabarek bungka nan piawai, naraco luruih main daun, indak basibak jo basisiah, bukan bahinggo jo babateh. Apolah nan ka ambo pasambahkan, si joroang manggali lambah, mamakai baju biludu gandum, kok tadorong ambo manyambah, sakali gawa baribu ampun.

Dirandang randang dimasak, dikirai kirai dipapa, tatangguak ikan gulamo, dibilang bilang dipapahkan, dicurai sitambo lamo, nan satitiak bapantang hilang, nan sabarih bapantang lupo, kok hilang curiang dibatu tulisan limbago tingga juo.

Takalo maso dahulu, di musim maso saisuak, katiko langik basintak ka ateh, katiko bumi basintak turun, Nabi Adam awa patamu, Nabi Nuh rasul kaduo, mako tajadi di tanah kuniang, ta antak ka tiang Arrassy, taeda ateh kurisi, batabua intan podi, baparmato intan biduri, ba aleh jo kain suto, suto banamo ainul banat tanunan anak bidodari, dalam sarugo tujuah pangkek

Kurisi kadudukan nan dipertuan,daulat sultan iskandar zulkarnaini,anak zhiiz alaihissalam,anak adam nan kurang aso ampek puluah.mako batiuik angin si dolak dolai,babuni gandang jo sarunai                     

Sarato rabab jo kecapi,sagalo buni-bunian dalam sarugo.takambang payuang ubua-ubua,tando alamat basuko hati,kawin jo anak rajo ruhun.dek haat takadia allah.allah taala kayo sungguah,dapek lah anak tigo urang,laki laki nan tuo maharaja alih ,nan tangah maharaja alih turun bakuaso di banua ruhun(ROMA),nan banamo maharaja dipang,turun ka banua tanah cino.maharajo dirajo turun ka pulau ameh paco nan ko.  

Manuruik curito tambo alam,pihak di sutan maharaja dirajo,taniat dalam hati,tacinto dalam kiro-kiro,balaia nyomaso itu diateh dandang nan sabuah,sarato urang nan banyak,cukuik nan tuo cadiak pandai,datuak suri dirajo,sarato cati cadiak pandai,nan datang dari nagari basa,ikuik jo  puti indo jati.

Dek lamo dandang balaia,di dalam lawuik baharullah,tampaklah api takijok-kijok,di ateh puncak langgapuri,gunuang suatu maso itu,banamo gunuang barapi,biroari maharaja dirajo,kapado cati bilang pandai,ditujukan dandang ka sanan.di tuju nyo cahayo lah hilang,galok gulito maso itu,tadampa dandang di sanan,di ateh puncak gunuang marapi.

 

 

Di mano titiak palito,di pucuak teloang nan batali,dari mano asa niniak kito iyo di puncak gunuang marapi.ssirawuik bari bahulu,diasah baru bamato,lawuik tan sajo dahulunyo,barulah ado pulau paco.sinan sirangkak nan badangkang,sarato buayo putiah daguak,di bawah batu hampa putiah,di bukik patah patigo,itulah bukik patah sambilan,nan banamo bukik si guntang-guntang,bukik nan tidak barangin,lurah nan tidak baraia.

Di sinan bintuak nan barayun,di bawah labuhan sitimbago,dakek ligundi nan baselo.dek niniak moyang maso itu,dibuek dusun jo taratak,sabalun bakoto jo banagari,di buek sawah gadang satampang baniah,makanan urang tigo luak,sarato rumah dengan tango.

Dek lamo musim bajalan,alam batambah leba juo,urang batambah kambang pulo,dibuek adat dikarang undang-undang,disusun tangkai ciek-ciek,dibubuah di kabek arek,di pakukan ka tiang panjang.

Dibuek adat ampek rupo,partamo suri njo tuladan,kaduo ukua dengan jangko,ka tigo barih jo balabeh,ka ampek cupak dengan gantang.dikarang undang-undang nan ampek,undang luak dengan rantau,luak dibari bapanghulu,rantau diagiah barajo.nan sokonyo turun tamurun,pusakonyo jawek bajawek,sampai sakarang iko kini.

Urang padang ma hanyuah banang,dikumpa mako dilipek,dilipek lalu dipatigo,kok dirantang namuah panjang,elok dikumpa naknyo singkek,singkek sakiro ka paguno.ujuik sambah buah rundiangan,nyato tawalak ka ukuran,tabayang barih jo balabeh,bana bak andai kato bida,dek curiang barih dahulu,dek andai pusako lamokalo basiang din an tumbuah,jokok manimbang din an ado,tumbuah sakarang iko kini…….

Ramo-ramo si kumbangjati,katik endah pulang bakudo,patah tumbuah hilang baganti,pusako lamo baitu juo.biriak-biriak tabang ka samak,dari samak ka halaman,patah sayok tabang baranti,tasuo di tanah bato.dari niniak turun ka mamak,dari mamak ka kamanakan,patah tumbuah hilang bagati,pusako di bao dek nan mudo.adaik pulai bapangkaik naiak,maninggakan

Ruweh jo bukumanusia bapangkek turun,maninggakan adat jo pusako.mati datuak baganti datuak,nan gala tatap bak samulo.

Tanatangan wajah sarupo iko,lah aia ka pambuluah,lah bulek kato ka mufakat,bulek lah buliah di golekkan,pipiah lah buliah di laying kan.tibo di adaik lah baiak,kalau limbago samo di tuang,tanduak samo di tanam,darah sudah baka………,dagiang samo dilapah,manuruik adaik nan bapakai,kok ketek banamo…….kini bagala datuak…..

Tantangan limbago nan bak itu,dek ketek banamo…….kini bagala datuak…..iyo nan samo sahamparan,samo sahilia an jo samudiak an,hutang nan kamambaia,piutang nan kamnarimokan,kusuik nan kamnyalaai,karuah nan kamanjaniahi.nak bahimbaukan di pakan nan rami,dilewakan di labuah nan golong,kapado urang di nagari.

Marabah sadundun dengan balam,sikok barulang pai mandi,sambah sadundun dengan salam,

Kato diharap dibunisi……….sekian sajo sambah pado datuak……..